Partia Demokratike ka akuzuar kryeministrin Edi Rama se ka dështuar me procesin e rindërtimit. Përmes një postimi në “Facebook”, drejtori i kabinetit, Dorian Teliti, deklaron se një vit pas tërmetit, kryeministri ka ndërtuar gjithsej 48 shtëpi nga 3,389 të dëmtuara, 1.4% e totalit.
Sipas Telitit, treguesi i dështimit me rindërtimin është vendimi i Ramës në shtator për përgjysmimin e financimit në buxhetin 2020 për fondin e rindërtimit.
Më herët, kryeministri Rama, në një konferencë me gazetarët, tha se deri në mars të vitit tjetër (që përkon me 1 muaj para zgjedhjeve), synohet të ndërtohen deri në 2500 banesa individuale.
Sipas Ramës, punimet po vijojnë tek shkollat e kopshtet, pasi janë kryer 60% të punimeve, kurse për infrastrukturën 30%.
Postimi i plotë:
Edi Rama ka dështuar në mënyrë spektakolare me rindërtimin. Asnjë video 3D e konferencës për shtyp nuk e fsheh dot gënjeshtrën dhe mashtrimin për banesat e qytetarëve.
Fakt: 1 vit pas tërmetit, ER ka ndërtuar gjithsej 48 shtëpi nga 3,389 të dëmtuara, 1.4% e totalit.
Në Thumanën e goditur më rëndë nga tërmeti, ER nuk ka ndërtuar ASNJË shtëpi, ASNJË godinë publike.
Treguesi më i drejtpërdrejtë i dështimit me rindërtimin është vendimi i ER në shtator për përgjysmimin e financimit në buxhetin 2020 për fondin e rindërtimit akorduar për FSHZH.
Që banesat e qytetarëve nuk do të ndërtohen këtë vit e tregon qartësisht heqja e fondeve të parashikuara për rindërtimin nga buxheti i këtij viti./ Opinion.al
