Ish-deputeti demokrat Astrit Patozi e ka cilësuar pozitive fitoren e Partisë Demokratike në zgjedhjet për kryetar bashkie në Kavajë.
Në një status në facebook, Patozi shkruan se edhe pse fitorja për Bashkinë e Kavajës është shumë e vogël përballë humbjes së PD në të gjithë Shqipërinë, Kavaja do të shërbejë si shkëndijë për rikthimin e demokratëve.
Statusi në Facebook i Astrit Patozit:
NJË FITORE ÇLIRUESE PËR KAVAJËN
Urimet më të mira Isa Sakja!
Një rikthim i vuajtur, por çlirues dhe i mezipritur tek fisnikëria dhe vlerat e marra peng prej vitesh të Kavajës.
Fitore e bukur për qytetin tim, edhe pse është vetëm një oaz i vogël në shkretëtirën e madhe të humbjes së Partisë Demokratike në zgjedhjet e 25 qershorit.
Le të shërbejë ajo si një shkëndijë e rindezjes së shpirtit të demokratëve në gjithë Shqipërinë. Ashtu si para 27 vjetësh, kur fitorja e madhe e Partisë Demokratike niste nga Kavaja. Ne do t’ia dalim.
