Ushtria turke është duke ndërtuar forca të reja përgjatë kufirit me Sirinë, duke ngritur alarmin se Ankaraja po përgatitet për një inkursion në shkallë të gjerë në territorin e mbajtur nga kurdët sirianë të mbështetur nga Amerika. Ky fakt është bërë i ditur nga zyrtarë të lartë amerikanë për Wall Street Journal.
Forcat përfshijnë luftëtarë të milicisë dhe komando me uniformë turke dhe artileri në një numër të madh që janë të përqendruara pranë Kobanit, një qytet me shumicë kurde në Siri në kufirin verior me Turqinë, thanë zyrtarët amerikanë, citon WSJ. Një operacion ndërkufitar turk mund të jetë i afërt, tha një nga zyrtarët amerikanë.
Rritja përgatitjeve, e cila filloi pas rënies së regjimit të Bashar al-Assad, duket e ngjashme me lëvizjet ushtarake turke përpara pushtimit të saj në 2019 në Sirinë verilindore. “Ne jemi të përqendruar tek ky fakt dhe po bëjmë presion për përmbajtje,” tha një tjetër zyrtar amerikan, thekson WSJ.
Ilham Ahmed, një zyrtar në administratën civile të kurdëve sirianë, i tha Presidentit të zgjedhur Donald Trump se një operacion ushtarak turk dukej i mundshëm, duke i kërkuar atij që të bëjë presion ndaj Presidentit turk Rexhep Tajip Erdogan që të mos dërgojë trupa përtej kufirit.
Qëllimi i Turqisë është të “vendosë kontrollin de facto mbi tokën tonë përpara se të merrni detyrën, duke ju detyruar të angazhoheni me ta si sundimtarë të territorit tonë”, i shkruan Ahmed Trumpit në një letër të parë nga The Wall Street Journal. “Nëse Turqia vazhdon me pushtimin e saj, pasojat do të jenë katastrofike.”
Kërcënimi nga Turqia i ka lënë Forcat Demokratike Siriane të udhëhequra nga kurdët, të cilët janë bashkuar me trupat amerikane në Sirinë verilindore për të sulmuar mbetjet e Shtetit Islamik, në një pozicion të cenueshëm disa javë përpara se administrata Biden të largohet nga detyra.
Sekretari i Shtetit Antony Blinken udhëtoi në Turqi javën e kaluar për të diskutuar të ardhmen e Sirisë me Erdoganin dhe për të kërkuar garanci se Ankaraja do të kufizonte operacionet kundër luftëtarëve kurdë.
