Pas takimit të sotëm në Shtëpinë e Bardhë në Uashington, kryeministri i Kosovës, Avdullah Hoti dhe presidenti serb Aleksandër Vuçiç do të ulen përsëri në një tryezë ditën e hënë në Bruksel.
Kjo është konfirmuar nga zëdhënësi i BE-së për Çështje të Jashtme dhe të Sigurisë, Peter Stano.
Sipas tij, të hënën do të zhvillohet takimi në nivel të lartë, ndërsa gjatë fundjavës së ardhshme, në nivel të ekspertëve.
Ai ka thënë se të hënën, Përfaqësuesi i lartë i BE-së për Politikë të Jashtme dhe Siguri Josep Borrell dhe Përfaqësuesi i Posaçëm për dialog, Mirosllav Lajçak do të presin kryeministrin e Kosovës, Avdullah Hoti dhe presidentin e Serbisë, Aleksandër Vuçiç në Bruksel.
Në takimin e së hënës, do të diskutohen çështjet që kanë të bëjnë me “aranzhimet për komunitetet jo shumicë dhe çështjet e kërkesave financiare dhe të pronësisë nga ana palëve”, thuhet në deklaratën e zëdhënësit.
I pyetur se a do të diskutohet edhe për dëmet e luftës, një çështje që në opinion është përmendur shpesh nga ana e zyrtarëve të Kosovës, Peter Stano ka thënë se vet ideja e takimit është që të diskutohet për të gjitha çështjet e hapura mes palëve.
Stano po ashtu ka refuzuar që të saktësojë se a kanë të drejtë apo jo palët në interpretimet e tyre për dialogun, me palën kosovare që thotë se është vetëm dialog politik që do të rezultojë me njohje, dhe atë të Serbisë se nuk diskutohet për njohjen.
“Ky është një dialog që do të rezultojë me një normalizim të raporteve mes palëve dhe që do të përmbyllej me një marrëveshje ligjërisht obliguese”, ka thënë ky zëdhënës i BE-së, duke shtuar se interpretimet dhe qëndrimet shpesh të ndryshme të palëve janë pjesë përbërëse e këtij procesi.
“Ne jemi lehtësues e jo komentues të dialogut”, ka thënë ai.
Takimet në Bruksel, këtë fundjavë dhe të hënën, vijnë menjëherë pas përfundimit të takimit në Uashington, mes Kosovës dhe Serbisë, të thirrur dhe ndërmjetësuar nga administrata e Shteteve të Bashkuara të Amerikës.
Dialogu mes Kosovës dhe Serbisë i ndërmjetësuar nga BE-ja rifilloi më 16 korrik, pasi ishte ndërprerë në fund të vitit 2018, kur Qeveria e Kosovës vendosi taksën 100 për qind ndaj produkteve të importuara nga Serbia dhe Bosnje e Hercegovina.
