Firma u vendos, Zef Hila do të jetë kryetari i dytë i një Bashkie që është shkarkuar nga Këshilli i Ministrave. Pak vite me parë ka qenë vetë kryeministri Edi Rama që ka shkarkuar kryebashkiakun socialit të Dibrës, Shukri Xhelili, i cili u kap në një video skandal teksa kërkonte favore seksuale.
“Në mbështetje të neneve 100 e 115, pika 1, të Kushtetutës dhe të shkronjës “a”, të nenit 62, të ligjit nr.139/2015, “Për vetëqeverisjen vendore”, me propozimin e kryeministrit vendosi: shkarkimin nga detyra, për shkak të shkeljeve të rënda të kryetarit të Bashkisë Dibër, z.Shukri Xhelili. Ky vendim hyn menjëherë dhe botohet në Fletoren Zyrtare”, thuhej në vendimin e qeverisë në vitin 2016.
Por kur shkarkohet një kryebashkiak?
Ligji nr 139/2015 për vetëqeverisjen vendore neni 62 parashikon dispozitat se kur shkarkohet një kryebashkiak.
“Kryetari i bashkisë shkarkohet me vendim të Këshillit të Ministrave në rastet kur:
a) kryen shkelje të rënda të Kushtetutës ose të ligjeve;
b) dënohet për kryerjen e një vepre penale, me vendim të formës së prerë, nga gjykata;
c) propozohet për shkarkim nga këshilli bashkiak përkatës për mosparaqitje në detyrë për një periudhë 3-mujore të pandërprerë.”
Sandër Lleshaj: Për arsye të shkeljeve të rënda të detyrës dhe të ligjit, të cilat kulmuan mbrëmë me sulmin ndaj KZAZ, të realizuar nga punonjës së bashkisë së Vaut të Dejës, kryetari i saj do të shkarkohet sot nga detyra me propozim të ministrit të Brendshëm. Të njëjtin fat do të ketë cilido që autoritetin e kryebashkiakut do ta përdorë për të penguar zgjedhjet, duke i lejuar punonjësit e bashkisë të sillen si forca të dhunshme paramilitare. Askush nuk do të lejohet të krijojë destabilitet dhe pasiguri./Opinion.al
