Sekretari i Përgjithshëm i PD, Gazment Bardhi është shprehur se skandalet e qeverisë “Rama” nuk mund të fshihen në asnjë takim në Berlin, Washington, Paris apo Bruksel.
Bardhi thekson se si në rastin Valdrin Pjetrit dhe Agim Kajmakut, Rama po hesht për kryebashkiakun e Vaut të Dejës, Mark Babani.
Sekretari i Përgjithshëm i PD, deklaron se Babani është arrestuar, dënuar dhe dëbuar nga shteti Italian. Ai i ka bërë thirrje prokurorisë që të nis verifikimin ndaj kryebashkiakut të Vaut të Dejës.
Reagimi i Bardhit
Asnjë takim në Berlin, Washington, Paris apo Bruksel nuk e fshin dot të vërtetën skandaloze se me Edi Ramën, njeriun që futi krimin në zgjedhje dhe qeveris me të, nuk ka për të pasur nisje të bisedimeve për anëtarësim.
Propaganda nuk mund ta mbulojë heshtjen e Edi Ramës për kriminelin e tij të Vaut të Dejës, Mark Babani. Njësoj si për Valdrin Pjetrin e Shkodrës, për Agim Kajmakun e Vorës, Edi Rama po fshihet edhe për Mark Babanin.
Kandidati i Edi Ramës ka mashtruar publikisht me formularin e dekriminalizimit dhe ai duhet të dalë para drejtësisë për këtë.
Është fakt se Mark Babani është arrestuar, dënuar e dëbuar nga autoritetet italiane dhe ai nuk e ka deklaruar këtë. Provat për këtë janë të pakundërshtueshme dhe prokuroria mjafton të ketë vullnetin t’i marrë në dorëzim ato.
Edi Rama dhe kandidati i tij për Vaun e Dejës duhet të sqarojnë publikun se çfarë i kujton data 4 Prill 1994.
As mashtrimet publike të Mark Babanit dhe as heshtja e Edi Ramës nuk e ndryshon dot të vërtetën.
Me kriminelët në parlament, me kriminelët në pushtetin lokal, me kriminelët në qeverisje nuk ka të ardhme për shqiptarët, nuk ka integrim, nuk ka Shqipëri si gjithë Europa./ Opinion.al E.Xh.
