Gazeta gjermane BILD botoi të hënën disa përgjime të tjera të realizuar nga Prokuroria shqiptare, lidhur me zgjedhjet vendore në Dibër, dosja 184. Janë të paktën 16 përgjime në të cilat janë përfshirë dhe drejtues të institucioneve lokale.
Në disa prej përgjimeve përmenden shifra parash që duhet të jepen në këmbim të votave, ndërsa drejtues të institucioneve lokale, si ai i drejtorisë arsimore, kërkojnë haptazi deklarimin e votës, nga vartësit e tyre, në favor të Partisë Socialiste.
Në një pjesë të mirë të përgjimeve rezulton një përfaqësues lokal socialist Arben Keshi, i cili sipas burimeve të PS, më pas është emëruar si drejtor në një prej institucioneve në varësi të Ministrisë së Brendshme.
Por pavarësisht se që nga kryeministri, që doli në poërgjime, dhe gjithë të tjerët kanë thënë që çështja të hetohet duket se një gjë e tillë as nuk ka për të ndodhur.
“Kjo dosje, i ka kaluar afati. Po bën tre vjet që po hetohet. Deri tani asnjë nga prokurorët nuk ka marrë asnjë veprim procedural. Nuk ka asnjë lloj reagimi nga prokuroria”, tha gazetari Fatos Hakorja në emisionin Opinion.
“Dosja e Dibrës, 184 ka një element shumë të vecantë, është për krim elektoral. Ka shumë të rëndëisshëm kapjen e flagrancës. Ka kaluar tre vjet nuk ka më as kushte flagrance, provat janë prishur”, deklaroi Artan Hoxha.
Për juristin Jordan Daci, prokuroria tani i mbetet vetëm të dalë e të thotë që kjo dosje ka marrë fund.
“Kjo dosje është e vdekur proceduralisht. Afati maksimal i hetimit, është deri në dy vjet. Më pas duhet ta zgjas prokurori i përgjithshëm, por që të jetë i vlefshëm duhet të njoftohen personat nën hetim. Asnjë njeri nuk është marrë i pandehur. Prokuroria më mirë të dali e të thotë kjo punë ka marrë fund. Me siguri që po të mos kishin dalë këto përgjime, kjo dosje ka marrë fund”. / Opinion.al
