Për herë të parë që prej vitit 1923, lumi Sena në Paris është rihapur për publikun për not, duke i dhënë fund një ndalimi 100-vjeçar për shkak të ndotjes së lartë.
Hapja e sezonit të notit në lumin Sena konsiderohet një nga trashëgimitë më të rëndësishme të Lojërave Olimpike “Paris 2024”, gjatë të cilave u zhvilluan garat e notit në ujëra të hapura.
Që në orët e para të mëngjesit të së shtunës, dhjetëra qytetarë u mblodhën për të shijuar përvojën e parë publike në ujërat e Senës. Tre zona janë të dedikuara për notin publik, pranë Kullës Eiffel, katedrales Notre-Dame dhe në lindje të Parisit.
Këto zona janë të pajisura me dhoma zhveshjeje, dushe dhe mobilie në stil plazhi, dhe mund të akomodojnë deri në 300 persona. Deri në fund të gushtit, pikat e notit do të jenë të hapura falas në orare të caktuara për këdo mbi 10 ose 14 vjeç, në varësi të vendndodhjes. Siguria do të garantohet nga rojet e plazhit.
Ideja për të rihapur lumin për notarët daton që nga viti 1988, kur ish-kryebashkiaku i Parisit dhe më pas president i Francës, Jacques Chirac, premtoi heqjen e ndalimit.
Në dy dekadat e fundit janë bërë përmirësime të ndjeshme për reduktimin e ndotjes bakteriale në lumë. Përgatitjet për Olimpiadën përfshinë investime mbi 1.4 miliardë euro për pastrimin e ujërave. Megjithatë, deri pak kohë para nisjes së lojërave, ekzistonin dyshime nëse lumi do të arrinte standardet e cilësisë së ujit për të pritur garat.
