Presidenti i Federatës Shqiptare të Futbollit, Armand Duka, është dukur i qetë pas fitores së kombëtares në Andorra. Ai ka thënë se trajneri italian u largua, për të shkundur ekipin.
“Në këtë fushë një ekip do lërë pikë, keni për ta parë. Për fat, nuk na ndodhi ne. Skuadra reagoi mirë, jam i kënaqur. Ndaj e bëmë këtë lëvizje duke larguar Panuccin para ndeshjes, për të shkundur disi ekipin”, ka thënë ai.
Duka ka thënë se i mbetet mendimit për një trajner të huaj, ndërsa tha se takimi me Edy Rejan në Shkodër ishte i rastësishëm.
“Takimi në Shkodër, pas ndeshjes së javës së shkuar, ishte i rastësishëm, diskutuam për ndeshjen dhe ai u tregua i sinqertë, nuk i pëlqeu skuadra që pa në fushë. I thashë që kemi emra të mirë, por natyrisht nuk biseduam për stolin. Tani e tutje do të mendojmë për emrin e trajnerit të ri. Mbetem i idesë që trajneri i huaj është prioritet, edhe pse Bulku e Mema kanë bërë një punë të mirë. Trajneri vendas njeh më mirë mentalitetin, në të ardhmen ndoshta do të emërohet trajner vendas, por jo në këtë moment. Nuk është e lehtë të flasim sa do zgjatë kontrata me trajnerin e ri, nuk bëhet asnjëherë një plan afatgjatë, por asnjë trajner nuk ka interes të bisedojë vetëm për 6 muaj, të gjithë duan projekt më afatgjatë”, është shprehur Armand Duka./Opinion.al
