Brazili është fituesi më i ri i Kupës së Amerikës. Pesë herë kampionët e Botës triumfuan 3-1 në finalen ndaj Perusë.
Sulmuesi Everton zhbllokoi takimin në minutën e 15, ndërsa kundërpërgjigjja e peruanëve do të vinte shpejt me veteranin Guerero që transformoi në gol një 11-metërsh.
Megjithatë, Brazili rimori avantazhin nëpërmjet sulmuesit Gabriel Jesus që shënoi pak sekonda nga fundi i pjesës së parë, ndërsa në të dytën e la ekipin e tij me 10 futbollistë pas daljes me të kuq.
Inferioriteti numerik nuk ndikoi te Brazili që vulosi fitoren në minutën e 90 me anë të Richarlison dhe ngriti lart për herë të nëntë trofeun e Kupës së Amerikës./ Opinion.al
