Federata Shqiptare e Futbollit ka reaguar pas tërheqjes nga gara e Kategorisë së Parë të ekipit B të Partizanit. Në një prononcim për “Panorama Sport”, shefi i sektorit të garave, Lysien Nurishmi, ka konfirmuar tërheqjen e Partizanit dhe ka sqaruar se çfarë do të ndodhë me vendin e lënë bosh nga “të kuqtë”.
“Pak orë më parë klubi i Partizanit ka dërguar një shkresë në FSHF, ku na bën të ditur se tërhiqet nga gara, me argumentin se nuk e kishte gati ekipin dhe ishte përgatitur për Kategorinë e Dytë. Në këto kushte, ndeshja e sotme nuk do të luhet. Tashmë Komisioni i Liçensimit do të vendosë për skuadrën që do të zëvendësojë Partizanin B”, tha Nurishmi. Sipas informacioneve që ka “Panorama Sport”, klubi i cili i plotëson kushtet për të marrë vendin e Partizanit është ai i Naftëtarit të Kuçovës./ Panorama sport
