Supersfida e javës së 26-të të Superiores, Partizani-Skënderbeu, u mbyll në barazim 1-1. Të parët kaluan në epërsi të kuqtë, me anë të sulmuesit serb, Stevan Raçiç, i ndihmuar edhe nga një gabim i portierit Orges Shehi. Në fund të kohës së rregullt barazuan korçarët, me anë të mbrojtësit Kristi Vangjeli. Pra, kampionët ua hoqën nga duart tri pikët e arta ndjekësve më të afërt për kreun, në luftën e titullit kampion, duke ruajtur “hendekun” prej 4 pikësh me ta. Një hap tjetër i konsiderueshëm i juglindorëve drejt “kurorës” së gjashtë radhazi në kampionatin shqiptar të futbollit. Megjithatë, ka ende javë për t’u luajtur dhe shpresat e “demave” për të triumfuar nuk janë shuar.
Sa i përket kronikës së ndeshjes së të hënës mbrëma, luajtur në “Qemal Stafa”, duhet evidentuar edhe penalltia e dhënë në favor të Partizanit, e gjuajtur keq nga Raçiç dhe e pritur nga Orges Shehi. Ai moment mund të konsiderohet edhe pika nevralgjike e ballafaqimit në fjalë, sepse po të ishte shndërruar në gol, gjithçka do të ishte mbyllur. Nuk ndodhi kështu dhe kjo u dha krahë korçarëve të rrisin forcën sulmuese dhe të barazojnë “in extremis”. Nga pamjet televizive u duk qartë se penalltia ishte e saktë, e sinjalizuar nga arbitri mbas porte. Pra, vërshëllima e kryesorit Enea Jorgji ka ardhur pas sinjalizimit të arbitrit te porta e Skënderbeut.
[fbvideo link=”https://www.facebook.com/Digitalb/videos/891731337591457/” width=”500″ height=”400″ onlyvideo=”1″]
