Partia Demokratike një ditë para mbledhjes së Këshillit Bashkiak të Tiranës deklaron se do të bojkotojë. Arsyet i ka dhënë zëdhënësja Ina Zhupa në një status në facebook. Sipas saj, Kryetari Veliaj nesë do të paraqesë një koncesion për parkingjet në Tiranë që do rëndojë më shumë xhepat e qytetarëve.
“Afera e parë është dhënia me koncesion tek një firmë private e mbledhjes së të ardhurave nga parkimet me pagesë në Tiranë. Për të rrjepur më shumë nga lekët qytetarët e Tiranës, Erion Veliaj do të vendosë disa pajisje për prerjen fizike të biletës. Ky shërbim do të paguhet ekstra nga qytetarët tek firma private që ka përzgjedhur Veliaj. Ky është një plan i hershëm i Erion Veliajt për të zhvatur para të tjera nga xhepat e qytetarëve, plan i cili do të miratohet nesër me votat e paligjshme të Këshillit Bashkiak”, shprehet ajo.
Po sipas zëdhënës së PD, Veliaj synon të vjedhë një pronë publike tek Policia Bashkiake, në rrugën e Kavajës, të cilën ia ka premtuar një prej klientëve të tij. “Ky vendim nuk është në rendin e ditës së Këshillit bashkiak nesër, sepse Erion Veliaj nuk ka 38 votat që i duhen për të bërë pazar me pronën publike”, tha ajo.
“Këshilltarët e PD do të vazhdojnë të mos marrin pjesë në mbledhjet e Këshillit Bashkiak, duke mos u bërë pjesë e blerjes së votave nga Erion Veliaj për projekte që grabisin pronën publike”, theksoi Zhupa. /Ri-De
