Pas humbjes së zgjedhjeve në Holandë nga ana e liderit të së majtës ekstreme, Geert Uilders, ministri i Jashtëm turk Mevlut Çavusglu ka pasur një reagim jo të zakontë.
Kreu i diplomacisë së Turqisë nuk e ka mirëpritur fitoren e kryeministrit Mark Rutte, i cili vjen nga radhët e qendrës së djathtë. “Tashmë zgjedhjet në Holandë kanë marrë fund. Kur sheh kaq shumë parti politike, kupton se nuk ka ndonjë diferencë të madhe mes social-demokratëve dhe fashistëve të Uilders”, ka thënë numri një i ministrisë së Jashtme turke, raportojnë mediet e shtetit turk.
Çavusoglu ka pasur një reagim të ashpër në lidhje me zgjedhjet që u zhvilluan në shtetin holandez. “Të gjithë në Europë kanë të njëjtin mentalitet. Ku po shkojmë. Ku po shkon Europa? Kontinenti europian ka nisur të rrëzohet. Ky kontinent është duke shkuar drejt humnerës. Luftërat e shenjta do të fillojnë së shpejti në Europë”, ka qenë mesazhi i shefit diplomatik të Ankarasë. Mes Turqisë dhe Holandës janë rritur shumë tensionet gjatë kohëve të fundit.
Lideri i së majtës ekstreme në shtetin holandez Uilders ka akuzuar me fjalët më të rënda presidentin turk Rexhep Tajip Erdogan, duke e quajtur këtë të fundit edhe “diktator”. Uilders madje ka mundur të ngrejë në protestë edhe një grup njerëzish, duke i dërguar në protestë pranë konsullatës turke në Amsterdam. Partia e kryeministrit Rutte ka marrë 33 deputetë, kurse partia antiislame ka marrë 20 deputetë. Ndërkaq, vetë Erdogan ka reaguar në lidhje me situatën, duke quajtur holandezët si “mbetje të fashizmit”. Gjithçka ka nisur, kur autoritetet holandeze ndaluan politikanët holandezë të bëjnë propagandë në qytetet e shtetit të Holandës.
