Rreth 72 mijë shtëpi dhe biznese mbetën pa energji elektrike që rreth orës 7 të mbrëmjes të së shtunës, në pjesën perëndimore të Manhatanit, në qytetin e New York. Ndërprerjeja disa orëshe e energjisë elektrike, mori fund pak para mesnatës të së shtunës, ndërsa të shumtë ishin ata që u tensionuan, veç të tjerash duke ngritur edhe shqetësime për sigurinë në qytetin gjigand.
Guvernatori i New York, Andrew Cuomo, tha se ndërprerja e energjisë elektrike nuk ishte si rezultat i infrastrukturës, por sidoqoftë ishte diçka e papranueshme.
“Duhet të kemi një sistem që është projektuar për të trajtuar ndërprerjet, në vend të një sistemi që ka efektin domino. Duhet të kemi teprica në sistem që të mos ndodhë ndërprerja. Thjesht, nuk mund të kemi ndërprerje energjie të këtyre përmasave. Egziston një mundësi e madhe rreziku për sigurinë publike dhe kaos në qytet.”
Cuomo tha se Departamenti i Sherbimit Publik do të nisë hetime për rastin, ndërsa vlerësoi banorët e qytetit për ndihmën e dhënë njëri-tjetrit ndërsa Manhatanin e kishte mbuluar errësira.
Ndërprerja e energjisë detyroi artistët të linin skenën në Broadway dhe të interpretonin në bulevardin e mbushur me njerëz, ndërsa koncerti i Jennifer Lopez në Madison Square Garden sapo kishte filluar kur u ndërpre energjia dhe u anulua pas vetëm katër këngësh.
42 vite më parë New Yorku u zhyt në errësisë pas ndërprerjes së energjisë elektrike ndërsa vendi kalonte një valë të nxehti./Opinion.al
