Ministri i Ekonomisë, Kulturës dhe Inovacionit, Blendi Gonxhja ka zhvilluar sot një vizitë zyrtare në Preshevë, ku u prit nga Kryetarja e Komunës, Ardita Sinani dhe Ambasadori i Shqipërisë në Serbi, Bardhyl Canaj.
Përmes një postimi në rrjete sociale, Gonxhja thotë se vizita u zhvillua në kuadër të Panairit të Parë të Librit Shqip, një nismë për përhapjen e gjuhës shqipe kudo ku jetojnë shqiptarë.
“Në Preshevë, në një takim të përzemërt me Kryetaren e Komunës, znj. Ardita Sinani, dhe Ambasadorin e Shqipërisë në Serbi, z. Bardhyl Canaj, në kuadër të Panairit të Parë të Librit Shqip.
Një organizim i veçantë për të sjellë gjuhën shqipe kudo ku ka shqiptarë, si një pasuri të madhe të përbashkët, për të cilën kemi detyrë ta ruajmë, ta kultivojmë dhe ta përcjellim ndër breza.
Gjithashtu, me shumë kënaqësi ju përgjigja ftesës së Kryetares Sinani për spektaklin “Shën Tereza, shqiptarja e gjithë botës”, për misionaren e madhe Shqiptare.
Si Ministër i Ekonomisë, Kulturës dhe Inovacionit, e konsideroj një nder dhe përgjegjësi të veçantë të jem i pari ministër përgjegjës për kulturën që viziton Preshevën, një vend ku ndjenja e përkatësisë kombëtare është e gjallë dhe e palëkundur, dhe ku respekti për gjuhën dhe kulturën shqiptare jetohet me dashuri e përkushtim, çka motivon e frymëzon më shumë mbështetje”, shkruan Gonxhja.
