Matthew Palmer, i dërguari i posaçëm i Shteteve të Bashkuara për Ballkanin Perëndimor ka folur për procesin e integrimit të vendeve të rajonit në Bashkimin Europian.
Teksa foli për moshapjen e negociatave për Shqipërinë dhe Maqedoninë e Veriut, Palmer theksoi se Këshilli i Europës duhet ti kthehet kësaj çështje në mbledhjen e liderëve në maj, në Zagreb.
“Ky ka qenë themeli për angazhimin amerikan në rajon për më shumë se 20 vite. Kjo nuk ka ndryshuar dhe nuk do të ndryshojë. Kjo është edhe arsyeja pse pamundësia e Këshillit Europian për të gjetur konsensus dhe të fillojë bisedimet për anëtarësim me Maqedoninë e Veriut dhe Shqipërinë ishte kaq zhgënjyese. Megjithatë Palmer tha se kjo nuk është fjala e fundit. “Shpresojmë që Këshilli i Europës t’i rikthehet çështjes në mbledhjen e liderëve në maj, në Zagreb, të arrijë konsensusin e duhur dhe të nisë atë proces aq të rëndësishëm duke dërguar sinjalin e rëndësishëm në rajon”,-tha Palmer.
Nga Davosi, ku po merr pjesë në Forumin Ekonomik Botëror Palmer foli dhe për projektin e Mini-Shengenit Ballkanik. Ai tha se ky projekt, që është një nismë e ndërmarrë fillimisht nga Shqipëria, Serbia dhe Maqedonia e Veriut për të mundësuar lëvizjen e lirë të njerëzve, kapitalit, mallrave dhe shërbimeve, ka mbështetjen amerikane.
“Angazhimi i Serbisë, Maqedonisë së Veriut dhe Shqipërisë të promovojnë bashkëpunimin përmes së ashtu-quajturës nisma e Mini Shengenit është shpresëdhënës, është një tregues që liderët në rajon po marrin përgjegjësi për fatin e tyre, po marrin në dorë të ardhmen e vet”, tha Palmer. “Arkitektura e kësaj nisme ka një skaj të hapur, ka vend për Malin e Zi, Bosnje dhe Hercegovinën, Kosovën. Nisma është premtuese, ka mbështetjen tonë dhe angazhimin tonë për të bashkëpunuar me liderët e Ballkanit Perëndimor për ta çuar përpara”,-tha Palmer/ Opinion.al
