Të paktën 44 persona janë vrarë në një shpërthim në Pakistan gjatë një mitingu të organizuar nga një parti islamike.
Më shumë se 100 njerëz u plagosën në shpërthimin në distriktin veriperëndimor Bajaur, ku Jamiat Ulema-e-Islam-Fazl (JUI-F) po mbante një takim.
Policia tha për BBC se ka gjetur prova që sugjerojnë se shpërthimi ishte një sulm i mundshëm vetëvrasës.
Një operacion shpëtimi ka përfunduar dhe të gjithë të lënduarit janë dërguar në spital, thanë oficerët.
Zyrtarët kanë paralajmëruar se numri i të vdekurve mund të rritet më tej, pasi 15 persona janë në gjendje kritike.
Motivi që fshihet pas sulmit nuk është ende i qartë. Forcat e sigurisë kanë rrethuar zonën dhe po hetohet për shpërthimin.
Fotot treguan qindra njerëz të mbledhur nën një tendë kur shpërthimi ndodhi afër skenës.
Një dëshmitar okular tha se tenda u shemb, duke bllokuar njerëzit që dëshpërimisht po përpiqeshin të shpëtonin.
Pamjet e transmetuara në televizionin lokal tregojnë ambulancat që transportonin njerëzit e plagosur në spital, ndërsa policia konfirmoi se ata me lëndime të rënda janë dërguar me helikopterë ushtarakë në Peshaëar aty pranë për trajtim urgjent mjekësor.
“Terroristët janë armiq të Pakistanit, ne do t’i eliminojmë nga faqja e ekzistencës”, tha kryeministri në një deklaratë.
Mbledhja politike ishte një mundësi për JUI-F për të rritur mbështetjen e saj, përpara zgjedhjeve që priten të zhvillohen më vonë këtë vit.
Ndërsa askush nuk ka thënë ende se ata e kanë kryer sulmin, dega lokale e grupit të Shtetit Islamik (IS) në Pakistan pretendoi se qëndronte pas disa sulmeve të këtij viti në Bajaur dhe më parë ka pretenduar se synonte JUI-F./Opinion.al
