Rovena Gashi kishte paditur Arta Markun në gjykatë për shkak se kjo e fundit e ka shkarkuar nga puna. Gashi ishte në krye të njësisë së Dekriminalizimit në Prokurori në kohën e Llallës. “Vendimi dhe urdhri nga ana e Kryeprokurores Marku është i ligjshëm dhe në përputhje me kompetencat e Markut”, deklaroi gjykata administrative që e rrëzoi padinë e Gashit.
Në vendim thuhet: Rezulton se urdhri i Arta Markut ka diskrecion personal. Sipas argumentimit të Gjykatës Administrative, aktualisht, funksionet e Prokurores së Përgjithshme i ushtron Arta Marku, përkohësisht. Në zbatim të ligjit, Marku ka kompetenca deri në krijimin e Këshillit të Lartë të Prokurorisë. Mes kompetencave, Arta Marku mund të vendosë caktimin e prokurorëve në pozicione të caktuara.
Ajo ka kompetenca të plota me qëllim mbarëvajtjen e punës. Në rastin konkret, lirimi nga detyra si drejtoreshë e Rovena Gashit është urdhër eprori dhe në përputhje me ligjin për kompetencat. Pala e paditur, Arta Marku, ka lëshuar aktin në fjalë për organizimin sa më të mirë të punës. Paditësja Rovena Gashi mban sërish detyrën si prokurore në Prokurorinë e Përgjithshme, pra, nuk rezilton se i janë cënuar të drejtat si magjistrate, vazhdon më tej argumentimi i gjykatës.
Në fund, gjykata çmon se kur urdhërohet një ndarje detyrash nga një epror, ky akt nuk mund t’i nënshtrohet kontrollit gjyqësor.
