Media e njohur “ABC News” ka rënë dakord t’i paguajë 15 milionë dollarë presidentit të zgjedhur të SHBA-së, Donald Trump, për një padi për shpifje.
Shuma që duhet t’i paguhet Trump u arrit pas një marrëveshje që grupi mediatik bëri me Presidentin e zgjedhur për të përfunduar kështu edhe përballjen gjyqësore mes palëve.
Trump, i cili ngriti një padi në Gjykatën Federale në Mars, pretendoi se gazetari George Stephanopoulos kishte shpifur kur tha se ai ishte përgjegjës për përdhunimin e shkrimtares amerikane, Elizabeth Jean Carroll.
George Stephanopoulos i bëri këto deklarata në mënyrë të përsëritur gjatë një interviste më 10 mars të këtij viti.
Si pjesë e marrëveshjes, rrjeti televiziv ra dakord gjithashtu të shtonte një shënim në fund të një artikulli të Marsit që shprehte keqardhjen e gazetarit për atë që ai tha gjatë një interviste me Nancy Mace, një anëtare e Dhomës së Përfaqësuesve të SHBA-ve.
Sipas marrëveshjes, ABC News do të paguajë 15 milion dollarë si një kontribut bamirësie për një “fondacion dhe muze presidencial që do të krijohet nga ose për paditësin, siç kanë krijuar në të kaluarën Presidentët e Shteteve të Bashkuara të Amerikës”.
15 milionë dollarët do të shkojnë për bibliotekën e ardhshme presidenciale të Trump, raportuan mediat amerikane.
Rrjeti gjithashtu ra dakord të paguante 1 milion dollarë për tarifat ligjore të Trump.
Kjo shënon një fitore të rrallë ligjore të Trump ndaj mediave.
Presidenti i zgjedhur gjithashtu ka një padi në pritje kundër CBS News, ndërsa më herët paditi The New York Times dhe Washington Post.
