Pesë tunele të Ministrisë së Mbrojtjes në kryeqytet do të jepen me qira për 20 vjet me një funksion të ri, kultivim kërpudhash. Ky ndoshta është propozimi më i rrallë që i është bërë Ministrisë së Mbrojtjes për objektet ushtarake që kanë dalë në shitje apo me qira. Lajmi është bërë i ditur në buletinin e ankandeve të dhënies me qira të objekteve të publikuar nga Ministria e Ekonomisë. Në njoftimin e djeshëm bëhej oferta publike e dhënies me qira të pasurisë “5 tunele dhe sipërfaqe funksionale në pronën e quajtur ‘Autorepart sh.a.’, Babrru, Tiranë” njësi në administrim të Ministrisë së Mbrojtjes, raporton sot Gazeta Shqip.
Ministria e Ekonomisë kryen dhënien me qira sipas vendimit të qeverisë të vitit 2014 që përcakton kushtet, kriteret dhe procedurat e dhënies me qira, enfiteozë apo kontrata të tjera të pasurisë shtetërore”. Ndërsa propozimi është bërë nga Ministria e Mbrojtjes. Me këtë hap, ministria nis procedurat për dhënien me qira, me konkurrim të 5 tuneleve, sipërfaqe të repartit ushtarak. Sipas genplanit, hapësira është 1478.63 m2, nga të cilat sipërfaqja totale e 5 tuneleve 1104.87 m2, si dhe sipërfaqja funksionale 373.76 m2. “Dhënia me qira e pasurisë bëhet me qëllim përdorimin e saj për zhvillimin e aktivitetit ekonomik, me objekt rritjen dhe kultivimin e kërpudhave”,përcaktohet në njërën nga pikat e njoftimit, trasmeton raporton sot Gazeta Shqip.
