Pas shpërthimit të fuqishëm që tronditi Lushnjën si pasojë e rënies së kontakt të vinçit me linjën e tensionit të lartë, OSHEE ka njoftuar stakimin e linjës 35kV Plasmas-Hysgjokaj për disa orë me kërkesë të organeve hetimore që po hetojnë rastin e rëndë.
Për pasojë, për disa orë pa energji elektrike do të jenë njësitë administrative, Hysgjokaj, Karbunarë e Vogël dhe Ballagat në Lushnjë.
Babë e bir humbën jetën, ndërsa 7 të tjerë u plagosën pasditen e sotme pasi vinçi me të cilin po punonin ra në kontakt me linjën e tensionit të lartë duke shkaktuar menjëherë një shpërthim të fuqishëm dhe flakë të mëdha.
Shpërthim ndodhi në vendin e quajtur “Rrethrrotullimi i Plasmasit”, në një kapanon në ndërtim në qytetin e Lushnjes në pronësi të deputetit PS, Bujar Çela.
Mes të plagosurve është dhe deputeti socialsit, i cili po i nënshtrohet një ndërhyrje kirurgjikale në spitalin e Traumës.
