Sekretari i Përgjithshëm i Partisë Demokratike, Gazment Bardhi, gjatë fjalës së tij në Kuvend tha se sektori i energjisë është në krizë dhe se fondet e OSHEE janë kthyer në një bankomat të qeverisë.
Bardhi u shpreh se sektori i energjetikës gjendet në këtë krizë për shkak të keqmenaxhimit 8-vjeçar. Ai gjithashtu tha se OSHEE i ka vjedhur shqiptarët përgjatë këtyre viteve.
“I keni kthyer në bankomat personal. Zonja Felaj tha sot se nuk futet dikush në burg nëse nuk paguan. Por shqiptarët janë njohur me histori të dhimbshme ku kryefamiljarë jo vetëm janë futur në burg, por edhe kanë vrarë veten. Kjo sot është një seancë e borxhit. Sot i kërkohet Kuvendit leje për të marrë borxh në këtë parajsën ekonomike që na ka krijuar qeverisja ekonomike e Edi Ramës”,-tha Bardhi.
Bardhi ka akuzuar qeverinë se ka shpenzuar 70 milionë euro për shpenzime luksi në OSHEE dhe se janë dhënë 240 milionë euro tendera pa garë. Për pasojë ai ka kërkuar që të ngrihet edhe një Komision Parlamentar për të verifikuar shpenzimet e OSHEE.
“Keni shpenzuar 34 mln euro, 8.4 mln euro për rikonstruktim zyrash, 23.5 mln euro për ruajtje fizike, sot keni dëgjuar shumë shifra nga të dyja palët,mund të jeni hutuar, dhe të na shihni me mos besim, ata që ju vjedhin janë këtu në qeveri, ai që ju ka ngarkuar me 4 mld euro borxh pa jua dhënë mbrapsht për rroga më të karta apo shërbime më të mira në spitale. 240 mln euro tendera janë dhënë pa garë, 70 mln euro shpenzime luksi në OSHEE. Kërkoj të ngrihet Komision Parlamentar për të verifikuar shpenzimet e OSHEE“, tha Bardhi.
