Deputetet e Partisë Demokratike kanë vazhduar edhe sot bojkotin në Komisionet Parlamentare. Ata paraqiten, mbajnë një deklaratë për të treguar situatën e rëndë të krimit në vend dhe largohen. E ngjashme ka qenë situata sot në Komisionin e Ligjeve ku flitej për pr/buxhetin e vitit 2018.
Deputeti demokrat Eduard Halimi tha se projektligji për buxhetin mund të diskutohej normalisht, nëse do të kishte edhe një qeveri normale. Por sipas tij, qeveria është e kapur nga krimi, dhe zhvillimet e ditëve të fundit e tregojnë qartazi këtë fakt.
“Në një situatë normale ne do të diskutonim për këtë ligj kaq të rëndësishëm. Por kjo ndodh në një qeveri normale, jo në një qeveri e lidhur me krimin dhe drogën. Qeveria është kapur në flagrancë me krimin. Qeveria në vend që të mbante anën e drejtësisë, i doli në krah Habilajve për tre javë. Iu bënë alibi. Pak ditë më parë një biznesmen u kap me 863 mijë euro dhe me patentat e ish-ministrit Tahiri që betohej se s’kishte patente skafi. Policia nuk e raportoi. Mbi 800 mije euro nuk mund të kalojnë kesh. Ose biznesmeni ose Kurum duhet të shkojë në burg. Arrestimi i biznesmenit është bërë pak metra larg burgut të Elbasanit. Furgoni i policisë së burgut ka ndërhyrë në këtë ngjarje, që e ka fshehur policia”, tha Halimi.
Pas kësaj deklarate deputetët e PD janë larguar nga mbledhja e Komisionit të Ligjeve.
