Lideri i opozitës Lulzim Basha do të takojë nesër në orën 10 paradite aleatët e tij të djathtë.
Takimi me aleatët vjen një ditë pasi Basha u takua me kryetaren e LSI-së, Monika Kryemadhi dhe kreun e grupit parlamentar të LSI, Petrit Vasili.
Në qendër të takimit mes Bashës dhe aleatëve do të jetë nisja e aksionit opozitar për protesta të fuqishme kundër qeverisë.
Ndërkohë që pasdite Basha dhe kryemadhi do të mbajnë një konferencë të përbashkët për mediat.
Siç duket, opozita ka “ndezur motorët” dhe është gati për të nisur valën e protestave, të paralajmëruara kohë më parë.
Kujtojmë se kryetari i PD-së, Lulzim Basha ka nisur një tur takimesh me strukturat në rrethe ku në qendër është diskutimi për aksionin i cili pritet që përveç debateve dhe kundërshtive politike në seanca dhe në komisionet parlamentare, do të jetë beteja në rrugë me protesta popullore.
Gjithashtu edhe në kampin e Lëvizjes Socialiste për Integrim kanë nisur përgatitjet, ndërsa degët janë udhëzuar që të marrin masa për pjesëmarrje masive.
Sesioni parlamentar në dhjetor të vitit të shkuar u mbyll me protesta të opozitës, kundër zgjedhjes së Prokurores së Përgjithshme të përkohshme.
Beteja e opozitës në sesionin e ri do të jetë shumëplanëshe.
Paralajmërohet se dy do të jenë çështjet jetike për të cilat opozita fton qytetarët të protestojnë; varfërinë si produkt i një qeverisje ilegjitime dhe dhënien fund të asaj që e cilësojnë qeveri ilegjitime.
