Emisioni i mbrëmshëm u fokusua sërish mbi tematikën e vrasjes së 14-vjeçarit në shkollën 9-vjeçare “Fan Noli” në Tiranë. I mituri u vra me thikë nga një bashkëmoshatar si pasojë e një sherri që nisi në rrjetet sociale.
Çfarë po ndodh nën shoqërinë shqiptare? Pse po rritet një brez i dhunshëm? Sa është përgjegjësi e jona? Sa është përgjegjësi e rrjeteve sociale? Si mund t’i mbrojmë fëmijët nga rrjetet sociale që po kthehen në një shqetësim, sidomos për ata që nuk janë ende të formuar?
Të ftuar: Blerim Gjeladini, Anxhela Faber, Gentian Progni, Paulin Vilajeti, Ermal Hasimja, Barbara Doda, Edlira Dyrmishaj, Besart Xhaferri
Në pjesën tjetër të emisionit, historitë e së enjtes. Si puna, përkushtimi, sakrifica të çojnë përpara ndryshe nga çdo lloj aktiviteti tjetër që shpeshherë lakmojnë të rinjtë. Uji Lajthiza është certifikuar nga BE për t’u tregtuar brenda tij dhe eksportohet në 12 vende të botës duke përfshirë SHBA, Emiratet Arabe dhe Tajvanin. Është historia e Hajri Elezit, një biznesmen shqiptar që në fillimet e para të demokracisë merrej me naftë dhe më pas vendosi të ngrinte një fabrikë uji në një zonë thuajse të harruar dhe të izoluar, por që shumë shpejt u kthye në një lloj fati për të dhe për karrierën e tij. Është një rrëfim i rrallë, shumë i ngjashëm me atë të biznesmenëve të parë shqiptarë të cilët u ngritën mbi sakrifica, duke investuar gjithçka që fitonin për të ndërtuar më pas një perandori biznesi nisur nga një burim në zonë e Lajthizës në Pukë.
