Anëtarja e kryesisë së Partisë Socialiste, njëherësh deputete, Olta Xhaçka ka reaguar pas lajmeve të shumta në media se kodi etik i PS i miratuar sëfundi nuk lejon burrë e grua me funksione drejtuese në parti.
Xhaçka në një intervistë për gazetën “Panorama”, shprehet se përcaktimi përjashtues nga asambleja për një nga bashkëshortët nuk është i vlefshëm për deputetët, të cilët janë automatikisht anëtarë dhe jo të zgjedhur.
“Kam parë shumë keqinterpretime të këtij neni nëpër gazeta e portale të nesërmen e Asamblesë Kombëtare. Unë dhe Artani jemi anëtarë “exofficio” të Asamblesë Kombëtare, si pasojë e të qenët deputetë të Partisë Socialiste”, tha ajo, ndërsa më tej sqaroi se “Kodi i Etikës tenton të rregullojë disa marrëdhënie etiko-morale për ta bërë sa më të drejtë vendimmarrjen e këtij forumi dhe nuk është as rregullore, as kod etike për veprimtarinë e deputetit”. “Pika 3 e nenit, e cila citohet në këtë rast, nuk është për deputetët, por për papajtueshmërinë e mandatit të kryetarit të PS-së në bashki apo komunë me funksione të tjera politike, të zgjedhura apo të emëruara në parti”, thotë ajo.
