Operacioni Forca e Ligjit i ka kërkuar sot dy të dënuarve për trafik drogë të deklarojnë pasuritë e tyre.
Konkretisht bëhet fjalë për Astrit Limanin dhe Edmond Sufjan, banues në Lezhë, të dënuar për trafikim të lëndëve narkotike.
Brenda 48 orësh, këta individë, si subjekt i Ligjit Special, duhet t’u përgjigjen me shkrim të gjitha pyetjeve të OFL-së. Më pas, përgjigjet e marra do t’i dërgohen SPAK-ut, për veprime të mëtejshme.
Astrit Limani është arrestuar vitin e kaluar për llogari të drejtësisë italiane pasi ishte dënuar me burg dhe i kishin mbetur edhe 10 vite nga dënimi për të shlyer.
Ai njihet në Lezhë edhe si “Titi i Ukës”. Në 15 nëntor 2013, Limani u arrestua në Serbi dhe më datë 20 dhjetor 2013 u ekstradua drejt Italisë, ku ishte dënuar për trafik droge në kuadër të një organizate kriminale. Ai ishte kthyer në Shqipëri teksa çështja ndaj tij shqyrtohej në Apel.
Në vitin 2015 Limani iu sekuestrua një pasuri me vlerë 10 milionë euro me vendim të Gjykatës së Lezhës. Siç thuhej atëherë në deklaratat zyrtare të policisë e Prokurorisë, në total tre pallate me 230 apartamente banimi dhe një hotel. Në vitin 2013, Astrit Ukë Nimani ishte anëtar i Këshillit Bashkiak në Bashkinë e Lezhës, nën siglën e Partisë Ora e Shqipërisë.
