Organizata Botërore e Shëndetësisë (OBSH) e ka përshkruar spitalin më të madh të Gazës si “pothuajse një varrezë”.
Spitali Al-Shifa – i cili ndodhet në veri të Gazës – ka qenë në vijën e parë të luftimeve intensive gjatë ditëve të fundit me Forcat e Mbrojtjes të Izraelit (IDF) duke këmbëngulur se Hamasi po operon një qendër komandimi dhe kontrolli në tunele poshtë spitalit. Ndërkaq, Hamasi dhe spitali e mohojnë këtë.
Zëdhënësi i OBSH-së, Christian Lindmeier tha se rreth 600 njerëz mbetën në spital, ndërsa të tjerët strehoheshin në korridore.
“Përreth spitalit ka trupa të pajetë për të cilët nuk mund të kujdeset apo as të varrosen apo të çohen në ndonjë lloj morgu”, tha ai. “Spitali nuk po funksionon më siç duhet. Është pothuajse një varrezë,” shtoi Lindemeier.
Mjekët kanë folur gjithashtu për trupa të grumbulluar dhe kalbur në spital.
Dr Mohamed Abu Selmia i tha gjithashtu BBC-së se pasi autoritetet izraelite ende nuk kishin dhënë leje që trupat e dekompozuar të largoheshin nga spitali për t’u varrosur, qentë kishin hyrë tani në mjediset e spitalit dhe kishin filluar të hanë kufomat.
Shqetësime ka edhe për fatin e dhjetëra foshnjave të lindura para kohe që nuk mund të qëndrojnë më në inkubatorët e tyre për shkak të ndërprerjeve të energjisë.
Selmia tha se shtatë nga ato foshnja tani kishin vdekur për shkak të mungesës së oksigjenit.
Mark Regev, një këshilltar i lartë i kryeministrit izraelit Benjamin Netanyahu, tha se Izraeli po ofronte “zgjidhje praktike” për evakuimin e foshnjave dhe akuzoi Hamasin se nuk pranonte propozime.
Si dhe Al-Shifa, spitale të tjera në të gjithë Rripin e Gazës kanë raportuar çështje të tjera, duke përfshirë mungesën e furnizimeve dhe energjisë për shkak të luftimeve dhe bllokadës që Izraeli ka zbatuar në territor që kur Hamasi filloi sulmet e tij ndaj Izraelit më 7 tetor.
