Varianti Omikron i koronavirusit duket se shkakton simptoma më pak të rënda dhe i bën vaksinat më pak efektive për sa i përket infeksionit dhe transmetimit krahasuar me variantin Delta, sikurse thotë Organizata Botërore e Shëndetësisë, megjithëse të dhënat janë ende të pakëta.
Omikron tani është i pranishëm në 63 vende, sipas OBSH-së që bën me dije se ky transmetim më i shpejtë u vu re jo vetëm në Afrikën e Jugut, ku Delta ishte më pak e përhapur, por edhe në Mbretërinë e Bashkuar, ku ky variant është mbizotërues.
OBSH parashikon megjithatë se “është e mundur që Omicron të kapërcejë infektimet e variantit Delta në vendet ku ka transmetim në komunitet.”
Të dhënat nuk janë ende të mjaftueshme për të përcaktuar ashpërsinë e sëmundjes së shkaktuar nga Omicron, edhe pse momentalisht simptomat duken “të buta deri në mesatare” si në pjesën jugore të Afrikës ku u gjet, ashtu edhe në Evropë.
Në lidhje me vaksinat e koronavirusit, sasia e vogël e të dhënave në dispozicion, si dhe profili gjenetik i Omikron, sugjerojnë një “reduktim të efikasitetit” të mbrojtjes kundër “infeksionit dhe transmetimit”.
Nga ana e tyre, Pfizer dhe BioNTech Labs – të cilat prodhuan vaksinën Cominarty, një nga më efektivet kundër Covid deri më sot – konfirmuan në fund të javës së kaluar se ajo ishte “ende efektive” ndaj Omicron, pas tre dozave.
Vendet që kanë mundësitë tashmë po i bëjnë thirrje shumicës së popullsisë që të marrë një dozë përforcuese. Kjo është veçanërisht e vërtetë në Evropë, e cila po përballet me një valë të re infeksionesh të shkaktuara nga Delta, për shkak të braktisjes së hershme të kufizimeve shëndetësore, por edhe disa herë shkallës së pamjaftueshme të vaksinimit.
Rëndësia e dozës së tretë u përmend sot, të dielën, nga epidemiologu kryesor amerikan Anthony Fauci, duke theksuar se nëse dikush dëshiron të jetë “i mbrojtur në mënyrë optimale, duhet të bëjë dozën e tretë”.
Ai tha për rrjetin ABC se dy doza të vaksinës Pfizer / BioNTech ose Moderna ose një dozë e vaksinës Johnson & Johnson mbeten përkufizimi zyrtar i vaksinimit të plotë sipas qeverisë amerikane./Opinion.al
