Kryeministri, Edi Rama i shoqëruar nga kryebashkiaku i Tiranës, Erion Veliaj, ishte këtë të shtunë në Kavajë, ku çelen fushatën në këtë qytet.
Gjatë fjalës së kryeministrit nuk munguan akuzat ndaj opozitës. Ai u shpreh se pala kundërshtare funksionon si bandë grabitqarësh dhe se nuk iu besohet pushteti.
“Që 30 vite qysh kur ka zgjedhje demokratike vendore në Shqipëri nuk kanë mundur të krijojnë një shembull të vetëm se dinë të kujdesen për një bashki, dinë të kujdesen për një qytet, dinë të kujdesen për një fshat. Më kujtohet që kur Kavaja u kthye përsëri në duart e tyre, të vetmet probleme që patëm ne me Kavajën nuk ishin më si të financojmë një projekt më shumë, si të bëjmë një kopësht më shumë, si të bëjmë dhe një shkollë më shumë, si të hapim dhe një tjetër hapësirë të gjelbër, si të krijojmë diçka të re, si të kemi edhe më shumë pastërti në bregun turistik të Kavajës, por të vetmet probleme që kishim ishin lejet në rërë. Lejet e dhëna në kundërshtim me çdo ligj, në kundërshtim me çdo interes publik, në kundërshtim me çdo sens të së bukurës dhe të ardhmes. E vetmja gjë që mbaj mend në ato vite kur ata e rimorën Kavajën, ishte se si përsëri Bashkia e Kavajës u vu në dispozicion të një grupi që funksion si tamam si bandë grabitqarësh kudo dhe kurdoherë atyre iu besohet pushtet. Kjo është e vërteta. Siç është e vërtetë që Kavaja u rikthye te pisllëku, as plehrat nuk mblidheshin më”, tha Rama.
Më tej Rama mori shembull Shkodrën që sipas tij, një prej kryeqendrave të Shqipërisë nuk ka përparuar sepse besimi për ta drejtuar i është dhënë opozitës.
“Kush ia jep votën atyre i pret vetes biletën për të ecur mbrapsht”.
Në fjalën e Ramës nuk munguan ironitë. Ai iu drejtua demokratëve duke u thënë se u “është mbytur anija”.
“Si ta ndalojmë tashi? Për çfarë? Për paratë ruse ta ndalojmë? Se janë llafe, janë llafe, por u bënë si shumë llafe, tani po dalin dhe kontot bankare që po vijnë si ato shishet që sjell deti kur mbytet anija. Se anija është mbytur atje. Vetëm këtu në Kavajë dhe në ca vende të tjera nuk e kanë marrë vesh akoma. O është mbytur anija! O demokratë, është mbytur anija! Ça do bëni tashi? Robinson Kruzo këtu i vetëm?”, u shpreh Rama.
