Burrë e grua të plagosur me armë zjarri, vajza e tyre e lënduar. Është ky bilanci i një ngjarjeje sa të rëndë aq edhe absurde, të ndodhur paraditen e 6 qershorit në fshatin Gosë të Rrogozhinës.
Në qendër të konfliktit që la të plagosur bashkëshortët S.Disha dhe N.Disha është qeni i tyre.
Por gjatë ditës së sotme, zënkat përshkallëzuan për përdorimin e armës.
“Fillimisht debati ka nisur për bagëtitë e familjes Disha, që kishin hyrë në territorin e fqinjit. Në debat e sipër, kryefamiljari Disha ka lënë të lirë qenin, që e mbante për ruajtjen e bagëtive. I shqetësuar nga kafsha, Osma fillimisht ka qëlluar për të vrarë qenin, por plumbat kanë kapur pjesëtarët e familjes Disha. Sipas dëshmisë së autorit të dyshuar, qëllimi i tij nuk ka qenë të plagoste fqinjët, por të qëllonte qenin që e konsideronte të rrezikshëm”, raporton gazetarja Arapi.
Tre prej plumbave prekën kryefamiljarin S. Disha. Një plumb preku bashkëshorten e tij, ndërsa e bija pësoi gërvishtje. Të plagosurit ndodhen në spital, fatmirësisht jashtë rrezikut për jetën.
Autori i dyshuar, Shpëtim Osma, pas plagosjes tentoi arratinë. Megjithatë, e gjithë zona u rrethua nga autoritetet policore dhe rreth dy orë më vonë ai u vetëdorëzua./tvklan
