Agjencia e Mbikëqyrjes Policore, Rajoni Durrës-Kavajë ka vënë në pranga një inspektor për shpërdorim detyre dhe korrupsion pasiv pasi ndihmoi disa persona të tjerë që të nxirrnin nafën nga një anije e sekuestruar në “Porto Romano”.
Siç bëhet e ditur, me finalizimin e operacionit “TURNI”, në pranga u vu Inspektor Armand Marvataj, 21 vjeç ndërsa në kërkim u shpallën J. K., 31 vjeç dhe D. M. 34 vjeç, të dyshuar për “Kontrabanda me mallra që paguhet akcizë me pezullim të plotë ose të pjesshëm nga detyrimet doganore”, “Vjedhje e kryer në bashkëpunim”, dhe “Korrupsioni aktiv i personave që ushtrojnë funksione publike”.
Dyshohet se tre personat e përmendur më sipër, në bashkëpunim me njëri-tjetrin, rreth orës 15:00, ata kanë bërë nxjerrjen e një sasie të konsiderueshme nafte nga Anija “AYAZANOYBYA” me flamur të Tanzanisë, që ishte ankoruar dhe sekuestruar në Porto Romano dhe ka qenë sekuestruar në cilësinë e provës materiale nga Prokuroria Durrës.
Ngjarja ka ndodhur më 27 janar.
Nga hetimet e kryera nga AMP dhe Seksioni për Hetimin e Krimeve Ekonomike e Financiare në DVP Durrës ka rezultuar se punonjësi i policisë A. M., ka lejuar kundrejt pagesës prej 10,000 euro, të dhënë nga 31-vjeçari J. K., nxjerrjen e sasisë së naftës të ndodhur në anije, në bashkëpunim me pjesëtarë të ekuipazhit.
Gjithashtu, në bashkëpunim janë kryer të gjitha veprimet proceduriale, duke përfshirë ri-këqyrjen e anijes, këqyrjen e pamjeve filmike në Porto Romano Durrës, marrje deklarimesh dhe marrjen e mostrave për ekspertim në të gjithë zonat e balastarve dhe ka rezultuar se sasia e naftës që ndodhej në këto hapësira në momentin e sekuestrimit (datë 12.01.2025) ishte zëvendësuar me ujë.
Ndërkohë, në gjendje të lirë janë proceduar shtatë persona të tjerë të dyshuar për “Kontrabanda me mallra që paguhet akcizë me pezullim të plotë ose të pjesshëm nga detyrimet doganore”, “Vjedhje e kryer në bashkëpunim”.
- L. K., 29 vjeç
- F. I., 23 vjeç (shtetas sirian)
- A. Sh., 22 vjeç (shtetas sirian)
- S. Sh., 25 vjeç (shtetas sirian)
- H. B., 47 vjeç (shtetas sirian)
- S. B., 53 vjeç (shtetas egjiptian)
- Ë. B., 42 vjeç (shtetas sirian)
