Gjykata e Tiranës la në masën “arrest me burg” Marsela Pushanin, arsimtaren e cila akuzohet për vrasjen e motrës së saj Amanda Pushani.
40-vjeçarja do të hetohet për veprën penale të vrasjes për shkak të marrëdhënieve familjare, akuzë që nuk u pranua prej saj në gjyq.
Mësohet se ajo ka thënë se gjatë përleshjes me motrën e saj e ka plagosur atë me thikë dhe më pas e ka mjekuar. Sipas Pushanit, motra e saj ka vdekur nga alkooli dhe jo nga plaga e thikës.
“Një natë me parë, unë dhe nëna kishim folur me Amandën. Na kishte premtuar që nuk do të pinte më, por pasi doli për disa orë nga shtëpia u kthye sërish e dehur. Teksa u përleshëm e plagosa, por më pas e kam mjekuar. Ajo u shtri në dhomën e saj. Nuk besoj se ka vdekur për shkak të plagës, por për shkak të alkoolit. Unë për motrën do të jepja jetën”.
Pushani ka kërkuar një masë më të butë sigurie, me pretendimin se i duhet të kujdesej për nënën e sëmurë.
Kujtojmë se ngjarja në familjen Pushani ndodhi të shtunën. Fillimisht, vdekja e 37-vjeçares Amanda Pushani u raportua si vdekje natyrale, por autopsia provoi se vdekja kishte ardhur nga plagët e një mjeti prerës.
