Gjykata e Tiranës ka caktuar masën e sigurisë “arrest me burg” për 37-vjeçarin Roland Kryemadhi, i cili u arrestua pak ditë më parë, pasi kërcënoi policinë me armë.
Në fund të seancës gjyqësore, avokati i 37-vjeçarit tha se kërkon zbutjen të masës së sigurisë për klientin e tij, duke e cilësuar atë jo të rrezikshëm për shoqërinë.
“Është i bindur në pafajsinë e tij pasi është dhe besimtar, dhe është i bindur se nuk janë kryer ato vepra penale. Fillimisht është thënë që ky person kishte armë, kishte kërcënuar dhe terrorizuar qytetin. Ëshstë bërë një kontroll i imtësishëm i banesës dhe nuk është gjetur asnjë armë. Është e vërtetë që ky ka kundërshtuar në gjykatë, por në kushtet e një varfërie ekstreme dhe duhej që të punonte. Kjo është dhe arsyeja që nuk ka pranuar që të mbrohet me avokat. Gjykata kërkoi caktimin e masës “arrest me burg”, duke e akuzuar për kanosje, fyerje, apo mbajtje e armëve të ftohta. Atij i është gjetur një thikë, që është normale për çdo familje shqiptare. Gjithçka është e sajuar për të vendosur masën e sigurisë arrest me burg, por ai realisht nuk është person me rrezikshmëri të lartë ndaj është e rëndësishme që ai të ketë një masë më të lehtë pasi duhet të sigurojë të ardhura për familjen. Nuk kishte akuzë konkrete lidhur me shkollimin e fëmijëve”, tha avokati i tij.
Roland Kryemadhi dhe gruaja e tij nuk lejonin tre vajzat e tyre të shkonin në shkollë, me argumentin se fëmijët e tij i shkollonte Allahu, ndërsa për arrestimin e tij u angazhuan edhe forcat RENEA, të cilat i rrethuan banesën.
Pas arrestimit të tij u tha se atij i ishte gjetur një kallashnikov në banesë. Por në një prononcim për mediat gruaja e tij tha se ata nuk kishin armë. Këtë gjë e pohoi sot në dalje të gjykatës edhe avokati i tij. /Opinion.al
