Gjykata ka vendosur këtë të premte masën e sigurisë “arrest me burg” për Selim Çekaj, babain e Arbër Çekajt. 72-vjeçari akuzohet për trafikim ndërkombëtar të lëndëve narkotike.
Mësohet se gjatë seancës gjyqësore Çekaj nuk i ka pranuar akuzat, duke deklaruar përpara trupit gjykues, kryesuar nga gjyqtari i çështjes Rexhep Bekteshi, se nuk kishte dijeni për sasinë e drogës së gjetur.
Ditën e djeshme policia sekuestroi në një kontejner me banane në Portin e Durrësit 49 kg kokaine, e cila vinte nga Ekuadori me destinacion Maminasin, për llogari të një firme, administrator i të cilës është Selim Çekaj.
Ndërkohë, më herët për ngjarjen ka reaguar edhe djali i tij, Arbër Çekaj. Në seancën që u zhvillua ndaj tij në Gjykatën e Posaçme të Apelit, Çekaj tha se ka një klan që po punon kundër familjes së tij dhe se historia është e sajuar për ta përfshirë të gjithë familjen në trafik droge.
Arbër Çekaj u arrestua 3 vite më parë pasi në firmën e tij zbarkoi një konteiner me banane nga Kolumbia, që kishte brenda 613 kg kokainë./Opinion.al
