Teksa ka kërkuar për herë të dytë të marrë fjalën në Kuvend dhe nuk i është dhënë nga drejtuesja e seancës, Lindita Nikolla, kreu i PD, Sali Berisha ka hyrë live në “Facebook” nga foltorja e Kuvendit, ku iu është drejtuar ndjekësve të tij.
Në fjalën e tij Berisha akuzoi Ballën për porositjen e vrasjes së avokatit të Çapjas, Ravik Gurra.
“Je i akuzuar për vrasje ke porositur vrasjen e Ravik Gurrës. Shko në prokurori. Hera e dytë që akuzohesh se porosit vrasje. Me asgjë nuk mund të lahesh për porositjen e vrasjes. Lartësoje prokurorin që ka fshirë regjistrimin, por nuk do të shpëtosh prej saj”-tha Berisha.
Këto akuza të Berishës ndaj Taulant Ballës, erdhën pasi ky i fundit akuzoi Berishën se ka shkelur rregulloren e Kuvendit, dhe se një non grata bën pis parlamentin.
“Të ankohesh se s’të jepet kohë në Kuvend kur ke folur 7 minuta përtej kohës pa prezantuar kërkesë për procedurë, është sa qesharake aq edhe sigurisht një tallje me sallën e Kuvendit, me publikun për një turp që ky Parlament duhet të ndalet në një nga seancat pasardhëse për të diskutuar për t’i dhënë fund kësaj tragjedie për Kuvendin që një non grata që ka të bredhi dhe të njihet me partnerët e birucave të vijë këtu dhe të bëjë pis sa herë i jepet mundësia duke shkelur rregulloren e Kuvendit. Vendimmarrja për të përcaktuar kohë me debat është ekskluzivitet e Konferencës së Kryetarëve sipas nenit 28 paragrafi 3 dhe sipas nenit 48 paragrafi 3. Kërkesë për procedurë nga përfaqësuesi i botës së përtejme nuk pati. I ftoj kolegët deputetë, meqënëse ka një propozim, propozimi të hidhet në votim të procedojmë me seancën sepse pika që vjen më pas është tepër e rëndësishme, ka të bëjë me një kërkesë deputetësh për situatën në veri të Shqipërisë, dhe pastaj të kalojmë tek çështja e Portit të Durrësit”, tha Taulant Balla.
