Ndjekja e një makine të dyshuar nga polica e Elbasanit ka përfunduar në një aksident të trefishtë ku kanë mbetur të plagosur pesë persona, mes tyre dhe një polic.
Mësohet se policia ishte në ndjekje të 27-vjeçarit Aldiron Shehu i cili kishte hyrë nga Greqia në Shqipëri dhe po udhëtonte nga Korça në drejtim të Elbasanit. Ai nuk i ishte përgjigjur thirrjes së disa postblloqeve për të ndaluar.
“Rreth orës 09:00, Salla e Drejtimit Korçë, ka njoftuar Sallën e Drejtimit të DVP Elbasan se mjeti tip Pasat i zi me targa greke IEH 3922, nuk i ka ndaluar shërbimeve të policisë Korçë dhe Pogradec dhe është larguar me shpejtësi në drejtim të Elbasanit“, njofton policia.
Në aksin Elbasan-Librazhd, në hyrje të Elbasanit, 27-vjeçari nuk i është përgjigjur sërsish thirrjes së policisë dhe ka goditur postbllokun e ngritur duke u përplasur dhe me dy makina të tjera që ndodheshin aty pranë.
Për pasojë janë plagosur pesë persona të cilët janë Durim Plaka, Adriana dhe Agim Mukja, Albert Cani dhe efektivi i forcave Shqiponja të Elbasanit, Eugen Abdurrazaku. Ky i fundit është dërguar në spitalin Ushtarak pasi është dëmtuar rëndë në njërën këmbë ndërsa të plagosurit e tjerë janë përcjellë në spitalin e Elbasanit pa dëmtime serioze.
Efektivi i forcave Shqiponja, Eugen Abdurrazaku
Pas aksidentit policia ka bërë ndalimin e Aldiron Shehut. Ai rezulton me precedentë penal pasi të njëjtin episod e ka kryer edhe gjatë vitit 2018. Në brendësi të makinës së tij janë gjetur një sërë targash false, të cilat ende nuk është mësuar se për çfarë do të përdoreshin/Opinion.al
