E ardhur posaçërisht nga SHBA për t’i dhënë një mesazh nënës së saj gjatë emisionit “E Diela Shqiptare” në rubrikën “Ka Një Mesazh Për Ty”, Leonora rrëfen edhe fatkeqësitë që kanë rënë mbi familjen e saj gjatë kohës që ajo qëndronte përtej oqeanit.
Për shkak të tyre, ajo mori një vendim të fortë e të prerë, duke i kërkuar prindërve të mos e njoftonin më për to pasi ajo nuk mundej të përballonte më shumë. Pikërisht për këtë arsye, asaj i ka mbetur peng që në frymëmarrjet e fundit të jetës, babai i saj nuk e ka kërkuar.
Sot, e penduar, ajo ka ardhur t’i kërkojë falje nënës së saj publikisht.
Leonora: Prezenca ime është për t’i dhënë mamasë sime një mesazh, t’i kërkoj një falje sepse i kam lënduar prindërit e mi, për arsye, 5 vitet e kaluara kemi përjetuar vetëm fatkeqësi në familjen e prindërve të mi, të vëllezërve të mi.
Ardit Gjebrea: Që do të thotë?
Leonora: Që do të thotë para 5 vjetësh kam ardhur për nipin, djalin e vëllait për një operacion në kokë, i hoqën një tumor në moshën 20-vjeçare, pas 8 muajsh ai humbi jetën. Kam ardhur përsëri dhe e kam gjetur 2 orët e fundit kur ishte ai tubacioni për 72 orë dhe 2 orët e fundit vëllai im kishte shpresë, por doktorët i thanë “duhet t’ia heqim tubin dhe duhet ta merni fëmijën”. Ishte një dhimbje shumë e madhe për vëllain, e përjetuam këtë dhimbje të madhe. Ndenja 10 ditë, ika përsëri, pastaj në 2019 pas 2 viteve e gjysmë, vëllai im humb jetën me infarkt në zemër, I cili kishte humbur djalin e tij 2 vite e gjysmë më parë.
Ardit Gjebrea: 2 fatkeqësi në të njëjtën familje.
Leonora: Në të njëjtën familje. Nisem urgjentisht, bashkë me djalin, më shoqëron djali. “Mami nuk të lë vetëm” sepse djali vëllezërve të mi i thërret “daja” me plot gojë, “nëna”, “gjyshi”, është shumë i respektuar dhe i dashur, dhe më ka shoqëruar ai, e di vetë sesi më ka sjellë për vdekjen e vëllait. Erdhëm nuk gjeta asgjë, vetëm një shuk me dhe, dhe para se të ikja përsëri iu thashë prindërve të mi, “Mos më prisni për raste të tilla, nuk vij më në Shqipëri, e kam zemrën plagë, do vij vetëm kur të martohet Suela, vajza e vëllait”. Mirëpo para 3 muajsh humba dhe babin. Babi nuk më kërkoi, të thoshte “vajza hajde se jam në orët e fundit” sepse e dinte vendimin tim.
Ardit Gjebrea: Nuk të kërkoi?
Leonora: Nuk më kërkoi. E dinte vendimin tim.
Ardit Gjebrea: Që ti nuk doje të vije më për fatkeqësi.
Leonora: Po.
Ardit Gjebrea: Dhe nuk të thanë gjë?
Leonora: Nuk më thanë gjë.
Ardit Gjebrea: Askush?
Leonora: Askush.
Leonora: Ditën që vdiq ishte ora 5 e 30 e mëngjesit këtu dhe 8 e 30 e darkës në Las Vegas edhe më telefonon mbesa e më thotë gjyshin e humbëm. U ndjeva shumë keq Ardit, u ndjeva shumë, shumë keq. Sepse unë i kisha lënduar prindërit e mi që nuk do vij më t‘ju shikoj, do vij vetëm kur të martohet mbesa, dhe prandaj i bëj thirrje nënës sime që të më falë publikisht. Sepse jam penduar për këtë fjalë.
Ardit Gjebrea: Pra ti ke 2 vjet pa ardhur në Shqipëri?
Leonora: Po. Afër 2 vjet.
Ardit Gjebrea: Dhe ke 2 vjet që se ke parë mamanë.
Leonora: Nuk e kam parë.
Ardit Gjebrea: Tek babi shkove?
Leonora: Jo. Pas emisionit do shkoj direkt te babi, te vëllai, te nipi, dhe pastaj do shkoj atje, tek shtrati i babit tim./ Tv Klan
