Byroja e Kuvendit ka përjashtuar për 10 ditë deputetin e Partisë Demokratike, Flamur Noka nga pjesëmarrja në seancat parlamentare.
Shkak u bë përplasja që deputeti i opozitës pati me atë të mazhorancës, Erion Braçe brenda sallës së Kuvendit.
Pas vendimit të Byrosë, opozita braktisi seancën parlamentare.
Mbledhja u Byrosë u thirr nga Partia Socialiste dhe është drejtuar nga kryetari i Kuvendit, Ilir Meta, i sapo kthyer nga një vizitë jashtë vendit.
Por sakaq edhe PD kërkoi përjashtimin e dy deputetëve të PS Erjon Braçe dhe Taulant Balla, pas incidentit të ndodhur në seancën e Kuvendit, me deputetin demokrat, Flamur Noka. Por Byroja nuk ka marrë masë përjashtimi për Ballën e Braçen.
Duke komentuar këtë vendim të Byrosë së Parlamentit, Noka e ka quajtur vendim të baronëve të krimit që sipas tij kanë kapur Kuvendin.
“Unë jam armiku politik dhe duhet të përjashtohem, ndërsa konet e krimit dhe baronët e krimit qëndrojnë aty. Kjo qeveri nuk meriton të qëndrojë në këmbë, sepse përbëhet nga një shumicë horrash që kërkojnë t’i mbyllin gojën opozitës. Opozita më 18 shkurt do të jetë në shesh dhe do t’u mbyllë gojën këtyre horrave”, është shprehur Noka.
