Kryeministri i Kosovës, Avdullah Hoti, ka thënë se Kosova ka nisur dialogun për njohje reciproke, dhe sot në Bruksel fillon draftimi i kësaj marrëveshje.
Në një status në Facebook, kryeministri Hoti shkruan se refuzimi ndaj dialogut në të shkuarën i ka lënë të izoluar por se ai tani po ushtron autorizimet kushtetuese pa asnjë ndërhyrje.
“Dialogu nuk ka alternativë. Por, dialogu teknik ka përfunduar. Tani Kosova ka nisur dialogun për njohje reciproke, dhe sot në Bruksel fillon draftimi i kësaj marrëveshje”.
“Qasja refuzuese ndaj dialogut dhe ndaj miqve tanë në të kaluarën e afërt na ka izoluar. Shtëpia nuk mbahet pa miq”.
“Kosova ka një Kryeministër që po i ushtron autorizimet kushtetuese pa lejuar asnjë ndërhyrje në ato autorizime, por duke e koordinuar agjendën e shtetërore të Kosovës me bartësit e institucioneve, me partnerët e koalicionit dhe me opozitën, si dhe duke e mbajtur plotësisht të informuar publikun e gjerë”, ka shkruar Hoti.
Ende nuk janë bërë të ditura detaje nga marrëveshja mes Kosovës dhe Serbisë. Procesi i dialogut mes dy vendeve rinisi sërish në Bruksel javën e kaluar me takimin e Hotit me Vuçiç. / Opinion.al
