Deputetit të fortë të Laçit, zgjedhur nga PS-ja, Armando Prengës, i hiqet mandati 4 muaj para mbylljes së sesionit parlamentar.
Lajmin për ndërprerjen e mandatit të Armando Prengës e dha Prokuroria e Përgjithshme përmes një njoftimi për media ku shkruhet se Prenga është në kushtet e ndalimit të ushtrimit të funksionit, në bazë të ligjit të Dekriminalizimit.
Sipas Prokurorisë, në formularin e vetëdeklarimit, Armando Prenga nuk kishte deklaruar një dënim të formës së prerë, dhënë nga Gjykata e Kurbinit, për veprën penale të “Falsifikimit të dokumenteve”, me 450 000 lekë gjobë.
Po kështu Prenga rezulton me precedentë penale në shtetin italian për vjedhje pasurish, falsifikime, marrje të pasurisë së vjedhur, deklarata për identitet të rremë në vitet 1996-1997 në qytetin e Milanos, etj. Këto të dhëna janë konfirmuar nga komunikimi zyrtar me autoritetet italiane, tha prokuroria.
Por jo vetëm kaq. Prokuroria thotë se KQZ u përpoq ta fshihte të shkuarën kriminale të Armando Prengës., ndaj tashmë po hetohet edhe vetë KQZ-ja.
Sipas prokurorisë, Komisioni Qendror i Zgjedhjeve ka qenë në dijeni të dënimit të dhënë nga Gjykata e Kurbinit për Armando Prengën dhe nuk e ka deklaruar. “KQZ e ka disponuar në 27.05.2016 me anë të një vertetimi të Gjendjes Gjyqësore. KQZ duhet të kishte bërë kallëzim penal menjëherë pas këtij konstatimi, pra në Maj 2016. Deri më sot, KQZ nuk e ka kryer këtë detyrim ligjor. Për më tepër, edhe në shkresën KQZ, datë 14.02.2017, sjellë për verifikim të thelluar pranë Prokurorisë së Përgjithshme, nuk specifikohet që subjekti i është përgjigjur me “JO” pyetjes nëse ka një vendim penal të formës së prerë”, bën të ditur prokuroria.
Armando Prenga është deputeti i tretë që largohet nga Parlamenti për shkak të ligjit të Dekrimalizimit. Më herët u është hequr mnadati Shkëlqim Selamit (LSI) dhe Dashamir Tahirit (PD). /Opinion.al
