Presidenti i Ukrainës, Volodymyr Zelensky, iu bëri thirrje njerëzve në mbarë botën që të dalin në protesta të enjten për të treguar mbështetjen e tyre për Ukrainën, në kohën kur shënohet një muaj nga fillimi i agresionit rus.
“Lufta e Rusisë nuk është vetëm lufta kundër Ukrainës. Kuptimi i saj është shumë më i gjerë”, shprehet Zelensky. “Rusia filloi luftën kundër lirisë. Ky është vetëm fillimi. Rusia po përpiqet të mposhtë lirinë e të gjithë njerëzve në Evropë”,-vijoi ai.
“Ejani në sheshe nga zyrat, shtëpitë, shkollat dhe universitetet tuaja, në emër të paqes, me simbolet ukrainase për të mbështetur Ukrainën, për të mbështetur lirinë, për të mbështetur jetën”, tha presidenti.
Fjalimi i Zelensky erdhi disa orë përpara samitit të NATO-s në Bruksel, ku vendet perëndimore pritet të bien dakord për dërgimin e përforcimeve në Evropën Qendrore dhe Lindore për të forcuar mbrojtjen e bllokut.
Presidenti amerikan Joe Biden do të marrë pjesë në takim në një ditë që do të shënojë një muaj nga fillimi i pushtimit rus./Opinion.al
