Një minutë heshtje ka mbajtur Kuvendi këtë të mërkurë, për ushtaraken që humbi jetën në mision në Letoni, Zarife Hasanaj. Një ditë pas ndarjes tragjike drejt Letonisë është nisur një Task Forcë e ngritur me urgjencë. Bashkë me autoritetet letoneze, Task Forca do të ndjekë hetimin e plotë për vdekjen e efektives Hasanaj në Kamp Adazi.
Në grupin që do merret me hetimin, ka përfaqësues nga Agjencia e Inteligjencës dhe Sigurisë së Mbrojtjes, Policia Ushtarake dhe Drejtoria e Inspektimit.
Mëngjesin e të martës në bazën ushtarake Camp Adazi u zhvillua ceremonia e nderimit për Nëntetaren e ndjerë Zarife Hasanaj, ndërsa po bëhen gati procedurat për kthimin e trupit në atdhe ditën e enjte.
Efektivja Zarife Hasanaj do të pritet në aeroportin “Nënë Tereza”, me protokoll ushtarak e me pas do të dërgohet pranë familjes se saj. Ceremonia shtetërore e lamtumirës për ushtaraken nga Tropoja do të zhvillohet gjatë paradites së të premtes./ Opinion.al
