Ngjarja në Rrëshen ka vënë në lëvizje Policinë e Shtetit, e cila ka nisur kërkimet për autorët duke përdor dronë e helikopterë.
Ngjarja e rëndë ndodhi paraditen e sotme në Rrëshen, ku mbeti i vrarë 59-vjeçari Martin (Marku) Bardhi dhe u plagosën 3 të tjerë.
Policia e Shtetit bën me dije se janë intensifikuar kontrollet në zonën ku u gjet makina e djegur, që dyshohet se u përdor nga autorët.
“Në kuadër të veprimeve intensive hetimore dhe gjurmuese për identifikimin dhe kapjen e autorëve të ngjarjes kriminale të ndodhur paraditen e sotme, në Rrëshen, ku u vra me armë zjarri shtetasi Martin (Marku) Bardhi dhe u plagosën 3 shtetas të tjerë, Policia e Shtetit po intensifikon kontrollet në zonën ku u gjet automjeti i djegur që dyshohet se është përdorur nga autorët e ngjarjes. Kontrollet në zonë po bëhen edhe nga ajri, me helikopter, nga shërbimet e Repartit Special RENEA. Zona po kontrollet nga toka, nga dhjetëra shërbime të FNSh-së, të Forcës së Posaçme “Shqiponjat” dhe forcat operacionale. Për kontrollin e zonës së pyllëzuar, shërbimet e Policisë janë duke përdorur edhe 5 dronë”, thotë Policia e Shtetit./Opinion.al
