Në një kohë kur parlamenti është me pushime, Presidenti nuk i ka kursyer kryetarët e grupeve parlamentare duke i kthyer nga pushimet. Arsyeja është zgjidhja e ngërçit mbi hedhjen e shortit për Këshillin e Lartë të Emërimeve në Drejtësi. I pari që mbërriti në Presidencë ishte kreu i grupit parlamentar socialist Gramoz Ruci, rreth orës 10:55, më pas edhe kreu i grupit demokrat Edi Paloka dhe ai i LSI, Petrit Vasili.
Pas miratimit të ndryshimeve kushtetuese për Reformën në Drejtësi, më 21 korrik, kreu i shtetit duhet që brenda datës 16 gusht të organizojë shortin për zgjedhjen e 9 anëtarëve në Këshillin e Emërimeve në Drejtësi.
Por kreu i shtetit gjendet përballë një vendimmarrjeje të vështirë për mënyrën se si do të duhet të zbatojë këtë kompetencë të re që i jep Kushtetuta. Pengesa për ushtrimin e një kompetence të tillë nga kreu i shtetit lidhet me faktin se ligji që do të detajojë kriteret që duhet të plotësojnë kandidatët që do të aplikojnë nuk është miratuar ende në Kuvend. Në këtë mënyrë përzgjedhja e 9 anëtarëve nga kreu i shtetit bëhet e pamundur. Disa ditë më parë, Kuvendi i Shqipërisë përmes një komunikimi shkresor i sugjeroi Presidentit Nishani të mos e ushtrojë formalisht kompetencën e tij thjesht për të respektuar afatet e vendosura nga Kushtetuta.
Në sugjerimet e tyre, juristët e Kuvendit sugjeronin se zgjidhja më e drejtë do të ishte që Presidenti të presë miratimin e ligjit përkatës, në mënyrë që të përcaktohen edhe kriteret përkatëse, mbi ta cilat do të zgjidhen anëtarët në Këshillin e Emërimeve në Drejtësi. Burime nga Presidenca thanë për Panoramën se i njëjti sugjerim kreut të Shtetit i ka ardhur edhe nga Partia Socialiste.
