Aksioni për heqjen e tabelave dhe strukturave në rrugët kombëtare ka nisur me aksin Tiranë-Rrogozhinë-Vlorë.
Grupe të përbashkëta të Inspektoriatit të Mbrojtjes së Territorit dhe Autoritetit Rrugor dolën në terren për të bërë zhvendsojen e të gjitha tabelave të reklamave, godinave të cilat shfrytëzohen për aktivitete private dhe bllokimin e rrugëve të kalimit që kanë pikat e karburantit, për të cilat nuk është dhënë leje nga Autoriteti Rrugor.
Afrim Qendro, drejtor i ARRSH: “Kioska, tabela, të gjitha llojet e aktiviteteve që janë në kundërshtim me Kodin Rrugor, të gjitha këto do të hiqen nga akset rrugore. Një rëndësi të veçantë dhe një njoftim dua të bëj për të gjithë njësi tregtare të karburanteve, sepse në të gjitha karburantet ne kemi tabela vertikale të vendosura në anë të rrugës në kundërshtim me Kodin Rregullor”.
Njëkohësisht me prishjen e strukturave të jashtëligjshme anës rrugëve, është duke u bërë edhe fotografimi i segmenteve të tjera në të gjithë vendin.
Dallëndyshe Bici, drejtoresha e IKMT: “Aksi parë që kemi zgjedhur për të filluar është Tiranë-Rrogozhinë që vazhdon pastaj deri në Vlorë. Puna ndërmjet të dy institucioneve ka filluar prej ditësh. Paralelesisht po punohet në të gjithë Republikën e Shqipërisë për të bërë njoftimet përkatëse dhe procedurat ligjore. Aksi që do pasojë do jetë Tiranë-Shkodër-Hani Hotit”.
Dallëndyshe Bici, drejtoreshë e IKMT: Dy javë më parë ministri i Infrastukturës dhe Energjisë u la afat bizneseve të bëjnë vetë zhvendosjen në mënyrë vullnetare. Tashmë janë grupet inspektorëve të terrenit që do të heqin strukturat. Pas fazës së parë, ministria e Infrastukturës do të nisë pastrimin edhe të ndërtesave të cilat janë të hipotekuara, duke bërë shpronësimin e tyre.
Tv Klan
