Në një prononcim për mediat në përfundim të seancës së ditës së sotme deputeti, Flamur Noka ka deklaruar se kryeparlamentarja Nikolla është larguar nga ambientet e Kuvendit me ambulancë.
I ashpër në fjalët e tij, Noka ka thënë se Linda e parlamentit s’do të gjejë paqe më.
Më tej ai theksoi se tashmë do të ketë mosbindje civile nga ana e opozitës kudo, duke nënkuptuar se aksioni opozitar do të vazhdojë.
“Nikolla doli me ambulancë. Ky është Kuvendi që të përjashtosh gjithë opozitën. Të kërkosh që të heshtin dhe mos të reagojnë. A ka parlament tjetër që ndodh kjo gjë?
A ka vend që opozita kërkohet me çdo kusht që të burgohet? A mund të na thotë dikush se çfarë i ka ngelur opozitës. Jo vezët, dhe domatet, po asnjë nga qeveria, Linda e parlamentit s’do të gjejnë paqe më. Do të kenë vetëm domate dhe në shtëpitë e tyre. Ka kaluar çdo limit ku demokracia mund të pranojë. Tani e mbrapa është mosbindja civile kudo që t’i shohim. Ku t’i shohin ti përbaltin dhe ti përbuzin.”, tha ai.
