Nga Majlinda BREGU
Ngjarjet e makabritet e ditëve të fundit, ai i gruas së vrarë nga bashkëshorti në Fier dhe ajo e sotmja në Korcë, kanë një të përbashkët: janë krim në familje.
Është krim, terror dhe jo cështje familjare apo zakonore.
Dje i kam kërkuar Ministrit të Drejtësisë një informacion mbi rastin e Liljana Rukaj nga Fieri e cila u flak nga ballkoni prej burrit, ndërkohë që sy të tmerruar komshinjsh vetëm shihnin se c’po ndodhte. Asnjë nuk e ndihmoi dot nenën e dy fëmijevë të mitur.
Ministri më njoftoi sot se gruaja ka patur një urdhër mbrojtje nga Gjykata e Rrethit Fier të cilin e kam bërë publik sot.
Sipas ligjit për Masat Parandaluese të Dhunës në Familje, Urdhri i Gjykates duhet të jetë Titull Ekzekutiv dhe të përcillet menjëherë, brenda 24 orëve me korrierin e Gjykatës tek Komisariati i Policisë, prokurori i cështjes, zyrës përmbarimit dhe koordinatorit për dhunën në familje pranë njësisë bashkiake.
Prej këtu lindte pyetja: Pse Policia nuk e mbrojti dot Liljana Rukaj.
Por para pak, Ministri i Brendshëm Sajmir Tahiri jep një tjetër version për përgjegjësinë institucionale.
“Pas denoncimit të të ndjerës, Policia ka bërë strehimin e saj në banesën e të vëllait të saj, dhe ka kërkuar menjëherë pranë Gjykatës Fier lëshimin e urdhrit të mbrojtjes.” Por ky urdhër Mbrojtje i lëshuar nga Gjykata sipas ministrit Tahiri nuk ka mbërritur kurrë në Polici.
Këtu jemi deri tani.
Gjykata thotë se ka lëshuar urdhër mbrojtje. Policia thotë se nuk e ka marreë. Pushteti Vendor nuk di gjë.
Nëse urdhri i mbrojtjes nuk është përcjellë nga gjykata në Polici, apo është përcjellë po atje s’ ka mberritur kurrë, unë këtë nuk e di.
Di se kushdo qoftë që nuk e ka zbatuar ligjin ose më keq e ka trajtuar këtë rast si një ndër rastet epidemike të dhunës në familje, sot duhet ndëshkuar po si bashkëshorti vrasës.
Nëse për 11 muaj kanë kërkuar ndihmë mbrojtje në Polici 3.758 gra si viktima të dhunë në familje: këto janë shifra lufte. Edhe po të ishte luftë nuk besoj se për 11 muaj do të ishin gjymtuar fizikisht e mendërisht 4000 gra dhe 10 mijë femijë mesatarisht.
Ndaj prej këtu sot, këtij vendi ku ndër vite kemi bërë ligje e miratuar ligje edhe të mira në letër, po i drejtoj një thirrje publike Prokurorit të Përgjithshem për të nisur me Urgjencë një Hetim Tërësor për papërgjegjshmërinë institucionale qoftë ajo e Gjyqtarit të Ceshtjes apo e Policisë së Fierit përfshi dhe Pushtetin Vendor, që coi në vrasjen e Liljana Rukaj.
I bëj Thirrje Presidentit të Republikes që në cilësinë e Kryetarit të KLD të nisë inspektimin tematik të rastit në Fier dhe për të gjitha rastet e vendimeve të Dhunës në Familje.
2 fëmijë janë vrarë sot nga babai i tyre. Dy të tjerë janë lënë jetim nga babai i tyre. Ne do të shkojmë të puthim fëmijët tanë në darkë duke falënderuar zotin që morti nuk është në shtëpinë tonë.
Unë nuk e detyroj dot institucionalisht Prokurorin e Përgjithshëm të nisë hetimin, por si grua, si nënë, kam një Zë që nuk e ka sot Liljana e të tjera viktima si ajo.
Ka një gjykatë që është më e lartë se ajo supreme dhe është gjykata e ndërgjegjes. Pa vendimin e saj, nuk ndodh asgjë – thoshte Mahatma Gandhi. Nesër mund të ketë një viktime tjetër.
