Ndonëse dy nxënës janë ndaluar dhe po procedohen lidhur me helmimin e gjimnazistëve në shkollën “Janaq Kilica”, duket se ngjarja është ende e veshur me dilema dhe pikëpyetje, edhe për shkak të një serie deklaratash dhe variantesh të saj. Dy të rinjtë e ndaluar, u tha se kishin një sprai me përmbatje piperi ose lëndë të gaztë, me të cilën duke e përdorur në shkollë kanë rrezikuar shëndetin e shokëve të tyre.
Por, Ervis Kuçi, njëri prej djemve të akuzuar, në një intervisëtë për “Neës24”, e ka mohuar këtë përgjegjësi. Ndonëse ka pranuar që atë ditë ai kishte në xhep një sprai të markës “Diva”, Kuçi pohon se në momentin e ngjarjes ai nuk ndodhej në ambientet e brendshme të shkollës, por në oborrin e saj. Ai shprehet gjithashtu se edhe shokët e tij të akuzuar për këtë ngjarje, janë akuzuar kot.
Dy ditë më parë në gjimnazin “Janaq Kilica”, rreth 60 nxënës shfaqën probleme shëndetësore dhe u drejtuan për ndihmë në spital. Një episod i ngjashëm kishte ndodhur edhe një javë më herët. Nëse herën e parë shkaktari u gjet tek një eksperiment në laboratorin e kimisë, në rastin e dytë përgjegjës u bënë dy djem bashkëmoshatarë.
Ndërkohë, gjatë ditës së djeshme, një tjetër gjimnaziste ishte ndjerë keq gjatë orës së mësimit dhe ishte drejtuar për ndihmë mjekësore. Media publikuan deklaratën e Drejtoreshës së Drejtorisë Arsimore Fier, e cila u shpreh përpara kamerave se vajza ishte shtatzënë.
Kjo deklaratë krijoi reagim të lartë, duke patur parasysh edhe moshën e vajzës në fjalë, ndërkohë që më pas drejtoresha e tërhoqi këtë deklaratë, duke pohuar në rrjetet sociale, se bëhej fjalë për një mësuese shtatzënë.
Pjesa nga intervista me gjimnazistin:
Çfarë ka ndodhur në shkollën “Janaq Kilica”?
Në fillim u tha se ka plasur gazi, por pas disa ditësh filloi të zbardhej ngjarja dhe doli se nuk ishte gazi.
A ke pasur gjë me vete?
Kam pasur një spraj që lexonte “Diva”, e gjeta në makinën time, por nuk e përdora, thjesht e kisha në xhep. E kam pas edhe ditë më parë në xhep.
Po ku ndodhi helmimi i dytë ishe në shkollë?
Jo, kam qenë në shkollë, por në atë moment nuk kam qenë në ambientet e shkollës, kam qenë jashtë.
Dy shokët e klasës tënde janë akuzuar për këtë ngjarje, çfarë di?
Di që shoku ka pas një anti-djersë në çantë, shoku tjetër e ka marrë dhe e ka shkrepur me çakmak thjesht për lojë.
Ishit në të njëjtën godinë?
Jo, ne ishim në godinë tjetër, ndërsa era e përhapur ishte në godinën tjetër.
Çfarë ke dëgjuar për ngjarjen?
Kam dëgjuar që është kapur ai i fundit që e ka bërë atë.
Mendon se je akuzuar kot?
Po, edhe dy shokët e tjerë. Jam i sigurt.
Je nxënës i mirë në shkollë?
Po.
